حوار مع الفوتوغرافي صلاح الدين هاني

حوار: عبدالرحمن ناصر

صلاح الدين هاني فتا ال 18 سنه ابن محافظة الإسكندرية هاوي التصوير الفوتوغرافي

-ممكن تحكلنا بدأت التصوير امتي وازاي؟

=بدأت تصوير من سنتين ونص وقت فيرس كورونا تقريبا، بدأت ذي اى حد قرر يغير من نفسه ومن شخصيته وكانت بدايتي انى اخدت قرار اول حاجه لازم اغيرها انى امارس الرياضه يومياً على البحر فشوفت مناظر طبيعيه قدامي ف بدأت اصور ذي اى حد شاف منظر طبيعي قدامه وبدأت انزل صور واخذ رأي اصدقائي.

أضاف "صلاح"

لحظت القبول من نحيتهم جدا و بدأت هوايه التصوير من هنا اشتغلت على نفسي اوى وحاولت ادخل مجال التصوير بشكل أكبر واتعلمت حاجات كتير وكنت بشتغل ب أقل امكانيات عندى لحد ما بقيت هاوي الموضوع اكتر واتفرجت على فيديوهات كتيره لحد ما بقيت متمكن فى التصوير الفوتوغرافي وبحاول أطور من نفسي اكتر لتقديم أفضل الصور.

-هل واجهتك صعوبات؟

=اكيد طبعا مفيش شخص ناجح مواجهش صعوبات فى حياته اكيد مع كل تعب الإنسان بيتعبه بيحس ب هلاك جسدي ونفسي ف هي الصعوبات حاجتين ي تاخد الصدمه وتكمل وتحاول تثبت لكل الناس انك قد اى حاجه مهما كانت الظروف اللى واجهتك أو المشاكل أو الصعوبات تنهي عليك وتدمرك ولما تفوق من الصدمه دى هتندم على كل وقت ضيعته بعدها.

أضاف "صلاح"

بنصح اى حد واجه صعوبات فى حياته عاوز أقوله متخليش حاجه تأثر عليك اكيد ربنا شايفلك الاحسن مش دايما حساباتنا بتبقي خير لينا ربنا بيحطنا فى المكان المناسب وبنكتشف ده بعدين ف لازم نحمد ربنا على كل حال واكتر حل لحل اى مشاكل فى حياتك هي الصلاة وايمانك بربنا كويس جدا دول اهم حاجه ده مفتاح الدنيا اللى هيفتحلك الطريق بتاعك للاخره.

-بالنسبالك التصوير هواية ام موهبة ولا ممكن اي شخص يصور؟

=التصوير الفوتوغرافي كان بنسبالى هواية وموهبه فى نفس الوقت لأن الاتنين بيكمله بعض طول ما الشخص اتعلم حاجه فى حياته وحبها تبقي دى هوايه بتعملها عن حب لكن الموهبه عمرك ما هتكتشفها من غير الهوايه لانك اكتشفت حاجه انت موهوب فيها صدفه ف حاولت تنميها علشان تكون متميز فى الحاجه دى.

أضاف "صلاح"

بخصوص اى حد يقدر يتعلم التصوير عادى ممكن اى حد يتعلم التصوير بس لو الشخص ده عنده اراده وشجاعه أنه يبدأ فى مجال فى ناس كتير زيك ف بتحاول تبقي متميز عن الكل علشان توصل مفيش حد بدأ من فوق لازم تاخدها من الصفر ويتفرج على ناس موهوبه دى عملت اى علشان توصل لكل ده، أنا واحد من الناس موضوع التصوير مكنش فى دماغي خالص الموضوع جاء من باب الصدفه بس انا اخدت الصدفه دى تحدي وحولتها لمنافسه اني ابقي مختلف عن الناس فى المجال ده وابقي متميز عنهم وعن فكرة التصوير وابدا اطلع موهبتي وأفكاري واستغلها وابدا اعرضها للناس وابقي حاجه أنا اكتشفتها فيا ربنا اوهمني بيها الحمدالله.

-رأيك المصور المثالي الناجح بيتصف ب اي؟

=الفوتوغرافر المثالي الناجح لازم يكون عنده خبره فى التعامل مع الناس اكثر ويعرف يجذبهم ليه من حيث شغله وطموحه ويكون عنده شجاعه وحلم فى الاستمرايه فى حياته مهما تعرض لأي ضغوط أو اذي فى حياته.

-مين مثلك الأعلى في مجال التصوير؟

=مفيش شخص معين كل واحد بشوف صوره بتعلم منه حاجة واكيد بكتسب افكار اكتر وفى ناس مش مشهوره خالص واتعلمت منها حاجات كتير اوى بردو ف كل فوتوغرافر عنده ابتكارات وافكار مختلفه عن التاني .. والواحد بيحاول يتعلم اكتر ويغذي بصيرته ب صورهم الجميله.

-كلمنا عن انجازاتك؟

=الحمدالله ربنا كرمني وقدرت اتميز فى التصوير الفوتوغرافر فى وقت صغير وتم التواصل معايا مع أحدي الصحفيين والحمدلله قدرت اطلع على جريده اليوم السابع والدستور والاهرام وكنت فوتوغرافر لتصوير اعلان pubg mobile بالتعاون مع اشهر كوسبلاير فى مصر واول فوتوغرافر يصوره فى مصر والحمدلله ربنا كرمني وقدرت اتعرف اكتر فى مجالي وبإذن الله اقدر اوصل لأعلى المراحل وابدأ أظهر على الشاشات الفتره جايه.

-كلمنا عن خططك المستقبلية في مجال التصوير؟

=خططي اني ابقي فوتوغرافر متميز جدا واقدر اوصل لناس أفكار اكتر وكنت شغال على اني احول التصوير العادى للتصوير بالذكاء الاصطناعي لأننا داخلين على عالم تكنولوجيا بشكل أكبر.

هل عندك مواهب اخري؟

=أنا واثق أن اللى قدر يظهر موهبه جواه يقدر يظهر مواهب تانيه انا لسه بحاول أظهر موهبتي الفكريه فى التصوير واقدر اربط كل موهبه فى حاجه واحده بحيث اقدر ابهر الناس ب موهبتي.