حوار صحفي مع الرسامة سما محمد

-اسمك وسنك ؟

سما محمد جابر عندي ١٩ سنه 

-بدات مشوار الرسم ازاي ؟

من و انا صغيره في الحضانه كنت بحب اوي ارسم و اتفرج علي فيديوهات تعليم رسم و اعاده تدورير و حرف يدويه و حاجات من دي كتير و كنت بحب اقعد ارسم مع بابا هو بيعرف يرسم كمان كان بيعلمني ارسم ميكي ماوس و شويا من الكرتون و كنت بلاقي دعم كبير اوي من ماما و بابا و عائلتي كلهم بجد .. 

انا فاكره اني وانا صغيره كنت بعمل خيمه و اقعد فيها ارسم بجد كانت اجمل لحظه فضلت حياه الطفله برسم ورد و شجر و عالم ديزني بتاعي لحد ما كبرت شويا و كبرت معايا الموهبه و كبر معاها حبي ليها بدات اهتم اكتر بالبورتريه و اتعلمته الحمد الله كنت مستنيه اوصل لمستوي ان اي حد يشوف الرسمه يقول واو بجد  و الحمد الله اعتقد وصلت بس انا واثقه ان طول ما انا عايشه برسم هتعلم اكتر و اكتر و هكتشف في الرسم حاجات كتير انا لسه معرفش عنها حاجه. 

-نفسك توصل لي اي في الرسم بعد كده؟

بصراحه انا مسخدمه الرسم كا هوايه انا بحب اعملها وقت فراغي لو مضايقه ارسم و مودي بيتحسن كتير و لو مبسوطه بردو ..بحس ان كل لوحه فيها مشاعر كتير اوي و فيها ذكرايات مع المشاعر بتاعتنا .. 

جربت اخد الرسم مهنه و اشتغل و ابيع رسومات اشتغلت كام شهر و مكملتش حسيت ان لسه الناس مش مقدره الشغل ده و قد اي انا بتعب فيه فا حبيبت اني ارسم لنفسي 

-اي الصعبات اللي وجهتك ؟

كان نفسي ادخل فنون جميله بس الحمد الله نصيبي كان في كليه اداب علم نفس فكرت اني بعد كده ممكن اعالج المريض النفسي بالرسم و الفن.

-كلمني عن انجازاتك؟

اني وصلت لموستوي في الرسم انا افتخر مبسوطه بيه و اني عندي علي الانستجرام وصلت لعدد كبير يعرفني و بيحب رسمي و عرفت من خلاله اصحاب جديده و فنانين بجد.

-تنصح الشباب بي اي ؟

اهم حاجه انكم تشتغلو في الحاجه اللي بتحبوها حتى او العالم كله و الناس كلهم شايفين انها تضيع وقت بل بالعكس انت لما تعمل حاجه بتحبها هتحب الدنيا و تحب تشتغل ع نفسك و تعرف نفسك اكتر.. اسعى للشئ ممكن يكون رسم او رياضه معينه و فكره اللي انت مؤمن بيها طول ما هي مش حرام طبعا.